yahi tohfa hai yahi nazrana

yahi tohfa hai yahi nazrana
main jo aawara nazar laya hon
rang mein tere milane ke liye
qatra-e-Khoon-e-jigar laya hon
aye gulaabon ke watan

pehle kab aya hon kuch yaad nahi
lekin aya tha qasam khata hon
phool to phool hain kanton pe tere
apne honton ke nishan pata hon
mere Khawbon ke watan

choom lene de mujhe haath apne
jin se tori hain kai zanjeeren
tu ne badla hai mashiyat ka mizaaj
tu ne likhi hain nai taqdeeren
inqalabon ke watan

phool ke baad naye phool khilen
kabhi Khali na ho daaman tera
roshani roshani teri rahen
chaandni chaandni aangan tera
mehtabon ke watan