main aur meri aawargi

phirte hain kab se dar ba dar ab is nagar ab us nagar
ek dosre ke hamsafar main aur meri aawargi

na aashna har rahguzar, na meharban hai ek nazar
jaen to ab jaen kidher main aur meri aawargi

hum bhi kabhi aabad the, aise kahan barbad the
be-fikr the aazad the, masror the dilshad the
wo chaal aisi chal gaya, hum bujh gaye dil jal gaya
nikle jala ke apna ghar, main aur meri aawargi

wo mah-e-vash wo mah-e-ru wo mah-e-kamil hu bahu
thin jis ki baten ku ba ku us se ajab thi guftagu
phir youn hoa wo kho gai aur mujh ko zid si ho gai
laen ge us ko dhond kar, main aur meri aawargi

ye dil hi tha jo seh gaya wo baat aisi keh gaya
kehne ko phir kya reh gaya, ashkon ka dariya beh gaya
jab keh kar wo dilbar gaya tee liye main mar gaya
rote hain us ko raat bhar main aur meri aawargi

ab gham uthaen kis liye, ye dil jalaen kis liye?
aansu bahaen kis liye, youn jan gavaen kis liye?
pesha na ho jis ka sitam dhonden ge ab aisa sanam
hon ge kaheen to kargar main aur meri aawargi

aasar hain sab khot ke, imkan hain sab chot ke
ghar band hain sab kot ke, ab khatm hai sab totke
qismat ka sab ye khel hai andher hi andher hai
aise hoye hain be-asar, main aur meri aawargi

jab hamdam-o-hamraz tha tab aur hi andaz tha
ab soz hai tab saz tha, ab sharm hai tab naz tha
ab mujh se ho to ho bhi kya, hai sath wo to wo bhi kya
ek be-hunar ek be-sabar, main aur meri aawargi