aaj ke din na pocho mere dosto

aaj ke din na pocho mere dosto
door kitne hain khushiyan manaane ke din
khul ke hansne ke din geet gaane ke din
piyar karne ke din, dil lagaane ke din
aaj ke din na pocho mere dosto 

zakhm kitne abhi bakht-e-bismil mein hain 

dasht kitne abhi raah-e-manzil mein hain
teer kitne abhi dast-e-qaatil mein hain
aaj ke din zubuun hai mere dosto
aaj ke din to youn hai mere dosto
 

jaise dard-o-alam ke puraane nishan
sab chale su-e-dil kaarwaan kaarwaan

haath seene pe rakho to har ustakhwaan
se uthe naalaa-e-al'amaan al'amaan
aaj ke din na pocho mere dosto 

kab tumhare lahu ke dareedaa alam

farq-e-Khursheed-e-mahshar pe hon ge raqam
az karaan taa karaan kab tumhare qadam

le ke uthe ga wo behar-e-Khoon yam-ba-yam
jis dil mein dhul jaye ga aaj ke din ka gham
 

saare dard-o-alam, saare jaur-e-sitam
door kitni hai Khursheed-e-mahshar ki lau

aaj ke din na pocho mere dosto 

Faiz Ahmad Faiz