Tum haqeeqat nahi ho hasrat ho

Tum haqeeqat nahi ho hasrat ho 
Jo mile khawab men wo daulat ho

MaiN tumhare hi dam se zinda hon
Mar hi jauN jo tum se fursat ho

Tum ho khushbu k Khab ki khushbu
Aur utni hi, be – murawwat ho

Tum ho pahlu meN par qaraar nahi 
Yaani aisa hai jaise furqat ho

Tum ho angRayii rang O nikhat ki
Kaise angRayi se shikaayat ho

Kis tarah choR duN tumhen janan
Tum meri zindagi ki aadat ho 

Kis liye dekhti ho aayeena 
Tum to khud se bhi khubsurat ho

DaastaaN khatm hone wali hai 
Tum meri aakhri muhabbat ho

John Elia

Naam hi kya nishaN hi kya khawab o khayal ho gaye

Naam hi kya nishaN hi kya khawab O khayal ho gaye
Teri misaal de ke hum teri misaal ho gaye

Saya E zaat say bhi rum, aks E sifaat se bhi rum
Dasht E ghazal main aa ke dekh hum to ghazaal ho gaye

Kitne hi nashsha-ha-E-zouq, kitne hi jazba-ha-E-shouq
Rasm E tapaak E yaar se ru ba zawaal ho gaye

Ishq hai apna paidaar, us ki wafa hai ustawaar
Hum to halaak e warzish E farz E mahaal ho gaye

Kaise zameeN parast the ahd E wafa ke paasdaar
UR kar bulandyun meiN hum, Gard E malaal ho gaye

Qurb E jamaal aur hum, Aish E wisaal aur hum ?
Haan ye hua K sakin E shahr E jamaal ho gaye

Jadaa E shouq main paRa Qahat E ghubar E karwaN
WaaN ke shajar to sar ba sar dast E sawaal ho gaye

Kaun sa qafila hai yeh jis ke jaras ka hai yeh shor
Main to niDhal hogaya hum to niDhal hogaye

khaar ba khaar gul ba gul, fasl E bahaar aa gayi
Fasl E bahaar aa gayi , zakhum bahaal ho gaye

Shor uTha magar tujhy lazat E gosh to milii
Khoon bahaa magar teray hath to laal ho gaye

Hum nafasaan E waz’a-daar, mustam’aaan E burd baar
Hum to tumharay waastay ek wabaal ho gaye

‘Joan’ karoge kab talak apna misalia talash
Ab kayi hijr hogaye, ab kayi saal ho gaye

John Elia

Aap apna Ghubaar the hum to

Aap apna Ghubaar the hum to
Yaad the, yaadgaar the hum to

Pardagi! hum se kyun rakha parda
Tere hi pardaa-daar the hum to

Waqt ki dhoop mein tumhare liye
Shajar E saayaa daar the hum to

URte jaate hain dhool ke manind
AaNdhiyoN par sawaar the hum to

Hum ne kyuN khud pe aetebaar kiya
Sakht be-aetebaar the hum to

Sharm hai apni baar baari ki
Be sabab baar baar the hum to

KyuN hamain kar diya gaya majboor
Khud hi be-ikhtiyaar the hum to

Tum ne kaise bhulaadiya hum ko
Tum se hi musta’aar the hum to

Khush na aaya hamain jiye jaana
Lamhe lamhe pe baar the hum to

Sah bhi lete hamaare ta’anon ko
Jan e man, jaaN nisaar the hum to

Khud ko dauraan e haal mein apne
Be tarah naa-gawaar the hum to

Tum ne hum ko bhi kar diya barbaad
Naadir e rozgaar the hum to

Hum ko yaroN ne yaad bhi na rakha
‘John’ yaaron k yaar the hum to

 John Elia

Saans chalti hai k zanjeer zani hoti hai

Mere seene se zara kaan laga kr dekho

Saans chalti hai k zanjeer zani hoti hai.

 

Abbas Tabish

Kia Zaroori Hai K Hum Haar Ke Jeeten Tabish

Kia Zaroori Hai K Hum Haar Ke Jeeten Tabish

Ishq Ka Khel Barabar Bhi To Ho Sakta Hai

 

Abbas Tabish

Main pathar nahi hon

Main pathar nahi hon

Mera yaqeen karo

Bas tumhen dil se utarney ki koshish mein 

Sari dunia mery dil se utar gai hai...

 

Abbas Tabish

Ik muddat se meri MAAN nahi soi Tabish

Ik muddat se meri MAAN nahi soi Tabish

Main ne ik bar kaha tha mujhe dar lagta hai