kab tak dil ki khair manaen, kab tak raah dikhao ge

kab tak dil ki khair manaen, kab tak raah dikhao ge
kab tak chain ki mohlat do ge, kab tak yaad na aao ge

bita deed umeed ka mausam, khaak urati hai aankhon mein
kab bhejo ge dard ka baadal, kab barkha barsao ge

ahad-e-wafa aur tark-e-mohabbat jo chaaho so aap karo
apne bas ki baat hi kia hai, hamase kia manwao ge

kis ne wasl ka soraj dekha, kis par hijr ki raat dhali
gesuon wale kaun the, kia the, un ko kia jatlao ge

'Faiz' dilon ke bhaag mein hai ghar basana bhi lut jana bhi
tum us husn ke lutf-o-karam par kitne din itrao ge 

Faiz Ahmad Faiz