is se pehle k bewafa ho jaen

is se pehle k bewafa ho jaen
kiyoun na aye dost ham juda ho jaen
tu bhi heere se ban gaya pathar
ham bhi kal kya se kya ho jaen
ham bhi majaboriyon ka uzr karen
aur kahin aur mubtala ho jaen
ishq bhi khel hai naseebon ka
Khaak ho jaen kimiya ho jaen
ab ke gar tu mile to ham tujh se
aise lipaten teri qaba ho jaen
bandagi ham ne chor di hai 'Faraz'
kya karen log jab Khuda ho jaen 

Ahmad Faraz