aaye kuch abr kuch sharab aaye

aaye kuch abr kuch sharab aaye
us ke baad aaye jo azaab aaye

baam-e-meena se maahataab utare
dast-e-saaqi men aaftaab aaye

har rag-e-Khoon men phir charaghan ho
saamane phir wo benaqaab aaye

umar ke har waraq pe dil ko nazar
teri meher-o-wafa ke baab aaye

kar raha thaa Gam-e-jahan ka hisaab
aaj tum yaad be hisaab aaye

na gaii tere Gham ki saradaarii
dil men yun roz inqalaab aaye

jal uthe bazm-e-Ghair ke dar-o-baam
jab bhii ham Khaanamaan_Kharaab aaye

is tarah apni Khamashii goonji
goya har simt se jawab aaye

'Faiz' thi raah sar basar manzil
ham jahan pahunche kaamayaab aaye 

Faiz Ahmad Faiz