naseeb aazmane ke din aa rahe hain

naseeb aazmane ke din aa rahe hain
qareeb un ke aane ke din aa rahe hain

jo dil se kaha hai, jo dil se suna hai
sab un ko sunane ke din aa rahe hain

abhi se dil-o-jaan sar-e-rah rakh do
ke lutne lutane ke din aa rahe hain

Tapakne lagi un nigaahon se masti
nigaahen churane ke din aa rahe hain

saba phir hamen pochti phir rahi hai
chaman ko sajane ke din aa rahe hain

chalo "Faiz" phir se kahin dil lagaen
suna hai Thikane ke din aa rahe hain 

Faiz Ahmad Faiz